Guverinoma y’u Burusiya yageneye umugabane wa Afurika doze miliyoni 300 z’urukingo Sputnik V rwa Covid-19, binyuze mu itsinda ryihariye Umuryango wa Afurika Yunze Ubumwe (AU) washyizeho rishinzwe gukusanya inkingo z’iki cyorezo, AVATT (Africa Vaccine Acquisition Task Team).
Nk’uko tubikesha The East African, aya makuru yemejwe n’Umuyobozi w’ikigo cya Afurika gishinzwe gukumira no kurwanya indwara (Africa CDC), Dr. John Nkengasong.
Dr. Nkengasong yagize ati: “Twishimiye kwakira inkingo za Sputnik V zo mu Burusiya, tukaba dutewe ishema no kuziha ibihugu bigize AU.”
Izi doze ziriyongera ku zirenga miliyoni 270 AVATT yari imaze kwemererwa kugeza muri Mutarama nk’uko byatangajwe na Cyril Ramaphosa wari Perezida wa AU, tariki ya 19 Mutarama 2021. Izo zirimo urwa Astra Zeneca, P zer-BioNTech n’urwa Johnson & Johnson.Biteganyijwe ko muri Gicurasi 2021, zizaba zageze mu bihugu byose bigize AU, uko ari 54 nk’uko byemejwe na Dr. Nkengasong.
